стабильный во времени

Қаржы маркетингісінің мәні неде?

Қаржы маркетингі сатушы-инвесторлардың қаржы активтерінің (ақшаның, бағалы қағаздардың, асыл металдар мен тастардың) өткізілуі үдерісін басқаруға жүйелі көзқарасы және сатып алушы-инвесторлардың қаржы активтерінің қорлануын басқаруға жүйелі көзқарасы болып табылады. Қаржы нарығы осы маркетингі қызметінің аясы болып табылады. Қаржы нарығындағы банк көрсететін қызметтерді немесе банк өнімдері мен қызмет көрсету нарығын қамтитын банк маркетингі қаржы нарығының құрамдас бөлігі болып саналады.

Банк маркетингі қандай атқарымдарды қамтиды?

Банк маркетингі – мыналарды қамтитын үдеріс:

- банк өнімін өндіруді жоспарлау;

- қаржы нарығын зерттеу;

- қарым-қатынасты жолға қою;

- бағаны белгілеу;

- банк өнімінің жылжытылуын ұйымдастыру;

- банк сервисінің қызметін өрістету.

Банк маркетингісінің негізгі міндеттері қандай?

Банк маркетингісінің негізгі міндеттері:

- сатып алушылардың банк өніміне қоятын талаптарын болжау;

- банк өніміне сұранымды зерделеу;

- сатып алушылардың талаптарына сай келетін банк өнімін шығару;

- бәсеке шарттарын ескере отырып банк өнімі бағасының деңгейін белгілеу;

- банкінің беделін көтеру;

- осы банк бақылайтын қаржы нарығының үлесін арттыру.

Банк маркетингісінің тұжы-рымдамасы дегеніміз не?

Банк маркетингісінің тұжырымдамасы қаржы нарығындағы банк қызметінің мақсатын сипаттайды. Банк өнімін сатып алушылардың мүдделері, қажетсінулері, мүмкіндіктері, ақша ресурстары алуан түрлі, тәуекел дәрежесі де әртүрлі. Сондықтан олардың нақты өнімге деген сұранымы да түрліше. Мұның мәнісі мынада: өз өнімін ұсынушы банк бұл өнімнің сатып алушылардың қандай тобына арналғанын және бұл өнімнің әлеуетті тұтынушылары қанша бола алатынын айқын білуге тиіс. Осыдан келіп банк қызметінің екі бағыты болуы ықтимал:

- жаппай, тұрақты сұранымға бағдарлануы, мұның өзі өнім бағасының (бағамы, пайыздық мөлшерлемесі) біршама төмен болуын, клиенттерге қызмет көрсетудің шектелуін және ұсақ сатып алушылардың кең қамтылуын көздейді;

- тұрақсыз сұранымға, яғни сатып алушылардың жекелеген топтарына бағдарлану, мұның өзі өнім бағасының (бағамы, пайыздық мөлшерлемесі) біршама жоғары болуын, клиенттерге неғұрлым кең ауқымда қызмет көрсетілуін және ұсақ сатып алушылардың аз қамтылуын көздейді.

Маркетингілік қызмет дегеніміз не?

Маркетингілік қызмет:

- тұтыну тұрпаттамасын әзірлеу жөніндегі;

- сұранымды зерделеу жөніндегі;

- банк өнімін өндіруді жоспарлау және оның іске асыру жұмысын ұйымдастыру жөніндегі іс-қимылдар кешені.

Банк өнімдеріне сұраным қалай жіктеледі?

Банк өнімдеріне сұранымды сатып алушылардың психологиялық-физиологиялық қарымта жауабына қарай және сатып алушылар қажеттерінің қанағаттандырылу дәрежесіне қарай жіктелуі мүмкін.

Психологиялық-физиологиялық белгі бойынша мыналарға бөлінеді:

- тиянақталған сұраным – банк ұдайы беріп тұратын банк өнімдерінің жекелеген түрлеріне тұрақты сұраным (банкідегі салымның ең аз сомасы 100 теңгеден аспайтын депозиттік салым, неғұрлым беделді банкілердің акциялары, т.б.);

- баламалы сұраным – таңдау бойынша сұраным, мұнда салымшы өз мүмкіндіктерін, табыстылық, тиімділік, тәуекелдік дәрежесін талдағаннан кейін капиталды банк өніміне салу туралы шешім қабылдайды (валюталық депозиттер сияқты активтерге, трастыларға, салым сомасы 3000 теңгеден аспайтын депозиттік салымдарға, т.б. сұраным);

- серпінді сұраным – күтпеген жерден болатын сұраныс; мұнда басқа сатып алушылардың, таныстарының, жарнаманың немесе басқа да факторлардың ықпалымен өз таңдауын жасаған сатып алушы өз шешімін өзгертеді (дивиденді (пайызы) жоғары болады деп күтілген бағалы қағаздар, т.б. бойынша сұраным).

Сатып алушылар қажеттерінің қанағаттандырылуы дәрежесіне қарай мыналарға бөлінеді:

- өткізілген сұраным (сұраным қызмет көрсету немесе банк өнімі сатып алушыға ұсынылған кезде қанағаттандырылды);

- қанағаттандырылмаған сұраным – сатуда жоқ немесе бар болғанымен ұсынымның көлемі бойынша сатып алушылардың сұрауынан артта қалған банк өнімдеріне сұраным;

- қалыптасушы сұраным, айқын көрініс таппаған сұраным.

Рендиттің мәні неде?

Рендит – бағалы қағаз табыстылығының салыстырмалы көрсеткіші. Акция рендиті акция бойынша төленген дивидендтің акцияның нарықтық бағамына пайыздық қатынасымен айқындалады. Рендит мөлшері жоғары болған сайын акция да табыстырақ.

Спрэд дегеніміз не?

Спрэд – ұсынымның ең төмен бағасы мен сұранымның ең жоғары бағасының арасындағы алшақтық. Спрэдтің сұранымның ең жоғары бағасына қатынасы барыша төмен (әдетте 3%-ға дейін) бағалы қағаздар неғұрлым өтімді болып табылады.

Банк маркетингісі үдерісі қандай кезеңдерді қамтиды?

Банк маркетингісі үдерісі мынадай кезеңдерді қамтиды:

- нақты банк өнімін сатып алушылардың қажеттерін зерделеу;

- қаржы нарығын секторлар бойынша кешенді түрде зерттеу;

- банк маркетингісінің ағым-дағы және келешектегі іске асырылуы мүмкіндіктерін зерттеу;

- маркетингіні жобалау;

- банк инновациясының өміршеңдік циклін жоспарлау;

- жарнама;

- банкілердің бөлімдері мен құрылымдық бөлімшелерінің жұмысын ұйымдастыру.

Банк маркетингі қандай атқарымдарды орындайды?

Банк маркетингісінің негізгі атқарымдары:

- ақпарат жинау;

- маркетингілік зерттеу;

- банк өнімдерін шығару және өткізу жөніндегі қызметті жоспарлау;

- жарнама;

- банк өнімдерін өткізу.

Банк маркетингісінің жоспары дегеніміз не?

Банк маркетингісінің жоспары банк өнімдерін, кәдуілгі және жаңа өнімдерін өткізу жоспары болып табылады. Бұл жоспар нақты уақыт кезеңінде қандай банк өнімін немесе қандай инновацияны, қай аумақта және қандай бағамен сату керек екенін айқындайды.

Банк маркетингі стратегиясының мәні неде?

Банк маркетингісінің стратегиясы:

- банкінің белгілі бір банк өнімін шығару жөніндегі мүмкіндіктерін талдау үдерісінде;

- өнім шығарудың мақсатын айқындауда;

- банк инновациясын негіздеу және оны сипаттауда;

- қаржы нарығын және банк өнімін ағымдағы кезеңде де, таяудағы келешекте де өткізу мүмкіндіктерін маркетингілік зерттеуде.

Банк маркетингінің стратегиясында қандай тұжырымдамаларды бөліп көрсетуге болады?

Банк маркетингісінің стратегиясында мына тұжырымдамаларды бөліп көрсету орынды:

- қаржы нарығын бөліктемелеу;

- нысаналы банк өнімін немесе қызмет көрсетуді таңдау;

- нарыққа шығу әдістерін таңдау;

- маркетингілік құралдарды таңдау;

- нарыққа шығу уақытын таңдау.